Proverbs 18
1Umuntu ongelamusa uzifunela okwakhe; uyazilahla zonke iziqondiso ezinhle. 2Isiwula kasikuthakazeleli ukuzwisisa kodwa sithokoza ngokutsho eyaso imibono. 3Nxa kufika ububi kufika lokweyisa, njalo ihlazo liza lokudumazeka. 4Amazwi omlomo womuntu ayinziki yamanzi, kodwa umthombo wokuhlakanipha ngumfudlana ontuntuzayo. 5Kakukuhle ukulungisela ababi loba ukungehluleli kuhle abangelacala. 6Izindebe zesiwula zisilethela ingxabano, lomlomo waso unxusa ukutshaywa. 7Umlomo wesiwula yiwo osidilizayo, lezindebe zaso zingumjibila womphefumulo waso. 8Amazwi omuntu onyeyayo anjengezibiliboco; ayangena emuntwini phakathi emibilini yakhe. 9Lowo ovilaphayo emsebenzini wakhe ungumfowabo walowo odilizayo. 10Ibizo likaJehova liyinqaba eqinileyo; abalungileyo babalekela kulo baphephe. 11Inotho yezikhulu ingumuzi wazo ovitshiweyo; zicabanga ukuthi imiduli yawo ayikhweleki. 12Umuntu uyazikhukhumeza ngenhliziyo yakhe, mandulo kokuba awe, ikanti ukuzithoba kwandulela udumo. 13Lowo ophendulayo engaqali alalele – lobo yibuwula bakhe lehlazo lakhe. 14Umphefumulo womuntu uyamqinisa nxa egula, kodwa ngubani ongaphila elomoya owephukileyo na? 15Inhliziyo yabaqedisisayo izuza ulwazi; izindlebe zabahlakaniphileyo ziyakudinga. 16Isipho siyamvulela indlela ophayo azuze ithuba lokubonana labakhulu. 17Ecaleni okhuluma kuqala ubonakala enguye olungileyo, kuze kuqhamuke omunye ambuzisise. 18Ukwenza inkatho kuyawuqeda umbango, kubehlukanise abaxabanayo. 19Umzalwane owoniweyo uba lukhuni kulomuzi ohonqolozelweyo, lezingxabano zinjengamasango enqaba avaliweyo. 20Isisu somuntu sigcwaliswa yizithelo zomlomo wakhe; usuthiswa yisivuno sezindebe zakhe. 21Ulimi lulamandla okuphila lokufa, njalo labo abaluthandayo bazakudla izithelo zalo. 22Lowo ozuza umfazi ufumana okuhle, athole umusa kuJehova. 23Umyanga uyancenga ukuthi axolelwe, kodwa isinothi siphendula ngolaka. 24Umuntu olabangane abanengi ucina kubi, kodwa kuba khona umngane othembeka okudlula umfowenu.
Copyright information for
NdeIBE